عرض الصورة بالكامل

السنة الثانية بكلية الطب - جامعة الملك فيصل

السلام عليكم ورحمة الله...

 

خلصتوا بيسك (المفروض يعني، شوي) والحين نقدر نعتبرها نقلة نوعية في الأشياء اللي بتدرسونها.

مرحبًا بكم في سنة ثانية (بعدها ثالثة)، سنة التخصصات 😈.

 

بدايةً، مايحتاج أكرر عليكم نفس المنوال...

كل سنة فيها أربع بلوكات، لاين بي دي، ولاين البروقرس..ومواد الدين لو ماخلصتوها حاولوا تخلصونها هالسنة، سواء في الترم الثاني أو الصيفي.

 

باختصار شديد

السنة هذي بتكون على شكل فصول دراسية في تنظيم المواضيع، أكثر من كونها بلوكات، بس هي بلوكات في الواقع

بمعنى، الترم الأول (بلوك ٢.١ و ٢.٢) بيركزون على النيورو، الأوفثا، ENT، والسايكا، يعني شغل مخ وأعصاب.

الترم الثاني (٢.٣ و ٢.٤) بيكونون مختصين بالطب الباطني، Medicine، عاد ذا فيه كل شي وبنتطرق لهم حبة حبة في تفصيل كل بلوك.

هالسنة بالمثل، عندكم اختبارين أورال...واحد في ٢.٢ والثاني في ٢.٤، بس مختلفينفي طريقتهمشوي عن سنة أولى.

بناخذ البلوكات واحد واحد وشاللي فيهم (في البداية مختصر، بعدين تفصيل للي حاب يقرأ)، وبعدها ننتهي بنصائح عامة للسنة ذي.

 

فلنبدأ..

 

بلوك ٢.١

 

هذا البلوك هو بدايتكم في قسم الآعصاب، راح تبدون فيه بشوية بيسك عن الفسيو للأعصاب (أشياء حيل بسيطة) وبشكل أعمق في النيورو أناتومي. طبعًا أكيد، عالأقل سمعتوا كلمة وحدة عن صعوبة النيورو أناتومي (مثل ماسمعنا ان الطب أصعب شي في الحياة)؛ اللي يقول هالكلام مايكذب عليكم، لكنه يعطيكم صورة ناقصة عن الموضوع. ماعلينا، بعد ماتخلصون البيسك في أول أسبوعين تقريبًا، بيستمر معاكم النيورو أناتومي على كامل البلوك بالإضافة لمواضيع تخصص النيورو مع د. أشرف والبيشنت مع د. سعود النعيم (رهيب بس لاتخلونه يعصب). المواضيع كانت تشمل الاختلالات العصبية-العضلية، اختلالات الحركة (مثل باركنسون)، اختلالات النخاع الشوكي، الصداع وأنواعه، وبعض المشاكل العصبية مثل الخرف وعدم القدرة على الكلام، وفي آخر أسبوع بتاخذون عن جلطات الدماغ. بتدخلون في الأوفثا، شوية بيسك عن العين مثل الأناتومي والفسيو، بعدها تبدأ الأمراض مع د. كبيري (شخص رائع بحق) ود. سيف، المواضيع بتتضمن التهاب عصب العين، الماء الأبيض والأزرق، التهابات العين نفسها. من بعدها شوية بيسك بسيط حيل عن الأذن والسمع، وبعدها مشاكل السمع والتوازن تقريبًا في آخر أسبوعين من البلوك وتتضمن فقدان السمع وأنواعه وبرضو أنواع اختلالات التوازن.

راح يكون في لابات أناتومي وفسيو بالخصوص في بداية البلوك، وبيكون في محاضرات ستاتك مع د. سيد وقلوبال مع دكاترته.

أغلب الكتب اللي شريتوها بتستخدمونها هالبلوك (نيورو أناتومي، نيورولوجي، أوفثا، وENT).

النيورو أناتومي كتاب مفصّل جدًا، حليو، بس المحاضرات شمنقاحبش...بمعنى، أفضّل لو تطلعون على القائمة التالية من بداية دراستكم، وتابعوا في الكتاب لو عندكم القدرة، مع أخذ نوتاتكم الخاصة (https://www.youtube.com/playlist?list=PLRANYZWWMvb4IQaV9Cc1YnMJLTISwY5pF).

النيورو مع د. أشرف حليو بس يهذر واجد، لو تتبعون معاه وتاخذون نوتات يكون شي ممتاز وبتستفيدون منه، وأسئلته ماتطلع من التجميعات. كتاب النيورو شوي سطحي ويمكن تحتاجون تبحثون أكثر عن بعض المواضيع، بس نصيحة سريعة، بداية كل شابتر في قصة قصيرة تعطيكم عن مرض معين في نفس الشابتر...لاتسحبون عليها أرجوكم، ترا بعضهم حلوين وبيخلونكم تتذكرون المواضيع لكل شابتر لفترة طويلة.

الأوفثا كتابه حليو، مرتب، لكن خصوصًا بالنسبة لدكتورة كبيري، عليكم بالتسجيل واللي تقوله تراها تقول معلومات كثيرة ومهمة وشرحها جبار جدًا.

الاي ان تي، كتابه ماعجبني شوي، بس بعضهم يحسه مرتب (على عكسي)...بس عالعموم يعتمد عالدكتور اللي يجيكم وشغلكم عالموضوع بس أنا ماجاز لي التخصص ومابي أحطمكم J.

البي دي بيكون خربطة كالعادة، تتجمعون وتسولفون.

التوتر هنا طريقتها مختلفة، بيكون عندكم المانوال، عندكم الكيس، وعندكم السشن تعرضون فيها..مافي سشن تحضير مثل سنة أولى.

 

بلوك ٢.٢

 

مشهور عنه انه بلوك السايكا، الكوردنيتر حقه د. شكيل وله أسماء أخرى.

عالعموم، هالبلوك تكملة تقريبًا للبلوك السابق، وزيادة عليه بيكون تخصص السايكا. البلوك ذا مرتب أكثر من سابقه في المواضيع وتنسيقها. راح تبدون بشوية نيورو عن الأعصاب الرئيسية وتكملة لأناتومي العين وعضلاتها (بيكون ف شوية لابات أناتومي). بتكون بعدها بدايتكم بالأوفثا مع د. كبيري بس، بتكملون موضوع الحَوَل بالتحديد. بعدها بتاخذون شوية مواضيع في النيورو بخصوص الغيبوبة وإصابات الدماغ ومنطقة ماتحت المهاد وأهميتها (hypothalamus). بعدها بتدخلون عميق في السايكا مع د. صايمة، د. علي السعد (أحسن واحد لو تسولفون معاه عن السايكا وأمور الدراسة)، ود. شكيل؛ أمراضه مألوفة لكم مثل الانفصام، الاكتئاب (اللي كلنا نسوي فاهمينه ونحاول نشرحه في تويتر)، الخرف، القلق، والوسواس القهري، وبتاخذون معاهم أدويتهم وشلون نعالجهم.  بعدها بتدخلون على مشاكل الأنف والحنجرة (خلصنا الأذن في ٢.١). بتاخذون البيسك من أناتومي وفسيو، وبعدها بعض الأمراض مثل اللحمية، انسداد الأنف، مشاكل البلع، وبعض مشاكل العصب السابع (لأنه يمر جنب الأذن، بيمر عليكم)، وبرضو علاجات النطق. بعدها بترجعون للنيورو، بتاخذون مواضيع مثل التصلب اللويحي/المتعدد، التهاب السحايا والدماغ، والصرع. بعدهها بترجعون شوي للسايكا وبتكملون باقي المواضيع، اللي هم مشاكل النمو النفسية عند الأطفال (مثل التوحد وفرط الحركة) واختلالات الشخصية وشوية مواضيع حشو مثل شنسوي في مرضى السايكا في المستشفى؟ طيب كبار السن شوضعهم؟ كذا.

هالمرة التوترمختلف، بيكون عندكم موقع تدخلون عليه ومع كل سشن بيكون في كيس معينة، تكتبون لها دفرنشيال، تسألون الموقع أسئلة، تسوون فحوصاتكم كأطباء، وتعطون التشخيص في نهاية الأمر وعلى هالأساس تسوون البرزنتيشن في السشن الجاي. بيكون في كم شغلة زيادة هنا على البرزنتيشن. في شي يسمونه referral letter، تُستخدم لتحويل المرضى من الطب العام للدكتور المتخصص..يبدأ فيها الدكتور يعطي هستوري المريض ويكتب لمين يبي يحوله بالتحديد وأسباب التحويل، تكتبونها وتقدمونها السشن الثانية. الشغلة الثانية اسمها additional information، مو إجبارية غالبًا (يعتمد عالدكتور)، فكرتها ان تأخذ بعض الأمراض اللي حطيتوها في الدرفنشيال وتشرحهم بشكل بسيط وليش استبعدناهم. الشغلة الثالثة بتكون 6-step treatment plan، بيكون شخص أو اثنين مسؤولين عن كتابة الخطة العلاجية للمريض اللي فحصناه (الكمبيوتر).

في هالبلوك برضو بيكون عندكم communication course. السنة الماضية في ١.٤ اهتمينا بمهارات التحدث مع المريض، شلون تبدأ محادثة معاه، شلون تُكسبه الثقة وتوضح له انك معاه وفاهمه ومهتم فيه، يعنو توطيد العلاقة بشكل عام. هالسنة بنشتغل على مهمتين رئيسيتين وهم شرح المرض للمريض بحيث انه يفهمه بالضبط ويعرف شاللي يعاني منه وليش، وبعدها بيكون الشغل على شرح الخطة العلاجية للمريض وشالأدوية اللي بياخذها المريض وشلون استخدامها ولمدة كم وليش كل دواء بالتحديد. الكيسات بتكون من اللي درسناها، وبيكون في كم واجب (يعتمد عالدكتور) انكم تكتبون كم كيس (تقدرون تشوفون كيسات من هالموقع: https://geekymedics.com/category/clinical-cases/). طبعًا نفس نظام السنة الماضية، تمثيل ووناسة.

البي ديبيكون عندكم دوام في العيادات، نفس السنة الماضية عشان تشوفون طريقة التواصل مع المرضى.

 

اختبار الأورالهنا طريقته غير..حيل شوي واجد

بيكون قسمين: -

-القسم الأول بيكون انهم يعطونك كيس معينة، تشخصها وتحط لها 6-step treatment plan. بعدها تروح للدكتور اللي بيلعب دور المريض وانت تشرح له العلاج وطريقته، المضاعفات الممكنة من هالعلاج وليش هالعلاج بالذات. طبعًا كل واحد ورقته محددة من قبل، وكتبوا عليها بالرصاص لاحد يصير قوي ويكتب بالحبر. يُفضل تودون معاكم أقلام تحديد (highlighter) وتحددون عالمعلومات المهمة، تعطي انطباع كويس للدكتور، لو حابين تتفلسفون شوي، طبعوا ورقة صغيرة فيها اسمكم ورقم تواصل مع ايميل تعطونها الدكتور في نهاية الاختبار، يمكن تعطي انطباع حلو عنكم.

القسم الثانيبيعطونكم كيس، تقرونها وتحللونها وبيكون عليها أسئلة شفهية متعلقة فيها بالتحديد. الأسئلة ممكن تكون في الاناتومي (لو مثلًا Bell’s palsy) أو متعلقة بأعراض المرض شلون ممكن تكون وشنو خيارات العلاج المتوفرة، يعني المفترض منك انك تكون مغطي موضوع الكيس كامل.

 

بلوك ٢.٣

 

هنا بلوك العظماء...هالبلوك ذا بتاخذون فيه أبرز أجهزة الجسم وأعمّها، تخصصات عدلة، بداية بالكلى، ثم القلب، تالي بتروحون للتغذية والغدد، بعدها للكبد وتنتهون بالجهاز الهضمي. بس قبل مانبدأ فيه، وفي نص كلامنا عنه، وفي نهاية حديثنا عن هالبلوك، والنصيحة العامة والخاصة، أرجوكم ذاكروا مواضيعه أول بأول، لاتأجلون ولاحرف ولانقطة عن وقتها. أدري ان النصيحة ذي عامة والمفروض نصير شطار ونطبقها على كل شي (هه) بس هنا بالذات بيوضح حجم الغلطة لو أجّلت شي، ولو كان بسيط حيل.

عالعموم...يبدأ البلوك مع د. هاني وكم دكتور من حقين بيسك السنة الماضية، بيكون بداية مع مواضيع بسيطة مثل تراكيز الأملاح وفايدة الكلى ووظائفها، بعدها تدخلون في أمراض الكلى نفسها مثل مرض الكلى المزمن اللي يؤدي للفشل الكلوي، ومرض الكلى الحاد، واللي ممكن يتحول لمرض مزمن وفشل كلوي بعدين (تفاصيل تفاصيل 😠!!). بعدها تنتقلون للقلب، بتكون معاكم د. إيمان الشيخ اللي هي أحسن دكتورة قلوب في العالم، وممكن بعد يكون معاكم د. عماد في كم محاضرة، وكم دكتور ثاني بعد. بتدرسون هنا تصلب الشرايين والجلطات العميقة في الرجل، صعوبة التنفس (أسبابها ومشاكلها)، مشاكل نبضات القلب (تسارع/تباطؤ)، الأمراض الرئوية-القلبية، أمراض الجدار القلبي، مشاكل صمامات القلب وشلون نعرف كل واحد منهم، أمراض القلب الوراثية، ونهاية بفشل القلب. بعدها تنتقلون للتغذية مع د. مسعد ود. ماجد، نبدأ بالفيتامينات، وشوية دهون وحركات، بعدين الانسولين والجلوكوز وتنظيمهم، بعدها ندخل سريع على أمراض الغدد (يمكن يجيكم د. أحمد) مثل السكري، مشاكل الغدة الكظرية، والدرقية وجارتها (طبعًا بنمر على كل الهرمونات). بعدها ننتقل للكبد مع د. سُمية وأمراضها، وأبرزهم التهاب الكبد وتليف الكبد، وبتمرون بعد على المرارة وحصواتها. ينتهي هالبلوك بالجهاز الهضمي العلوي، يعني نبدأ من المريء وننزل للمعدة وناخذ شوي مشاكل البنكرياس (يعني تقريبًا وصلنا الـ duodenum). بكذا يكون خلص البلوك، بسيط؟ أي بسيط مب مستحيل، لكنه بلوك غني بالمعلومات الكثيرة الكثيرة والمهمة، يعني ماتقدر تقول بذاكرها بعدين أو ماعليه اسحب عليها. أرجع من جديد أذكّر هنا بأهمية المذاكرة أول بأول، ترا ماحد يبي يحط نفسه في موقف انه متأخر في المذاكرة أسبوع أو أسبوعين والاختبار بعد كم يوم، لاتجربون هالشي، مب حلو.

التوتربيكون نفس طريقة ٢.١، عندكم سشن تعرضون فيها وتخلصون كل شي.

بيكون عندكم BLSمرة وحدة بس لكل قروب، بتراجعون مواضيعه وبتختبرون في نفس الوقت، بعدها بتاخذون تدريب عملي سريع..بسيط حيل، اعتبروه مراجعة لكم.

صديقكم الصدوق في هالبلوك هو كومار، بيكون معاكم هالبلوك واللي بعده. الكتاب مب حلو، ومب سيء، حليو، لأن الكتاب فيه كل شي في الباطنية، لكن مب كل المواضيع مشروحة بنفس الأسلوب. بمعنى، يمكن تشوف مواضيع الكلى مب مفهومة وصعب انك تلقط منها شي، بس تنصدم انك حيل فهمت مواضيع القلب. ماعليه، طبيعي هالشي. برضو، الكتاب طريقته غير، لأنه مب يشرح لك كل شي (في مواضيع يسهب فيها ومواضيع يسحب عليها، من مخه)، وبرضو بيكون يجيب لك بيسك السستم بداية الشابتر وبعدها يدخل مباشرة في الأمراض. هنا انت شلون تعرف ليش هالعرض طلع في هالمرض؟ هنا تبدأ القوى الخارقة، اما انك شاطر حدك وفاهم بيسك سنة أولى صح، بيصير تفهم كثير من المعلومات عالطاير، وقليلة المعلومات اللي بتضطر تبحث عنها وتقرأ من البداية. بس لو واحد شوي عنده مشكلة في هالموضوع، لازم ينتبه لنفسه ويعرف انه بيستغرق أكثر من غيره في ربط الأعراض لكل مرض. فيرجعنا لنصيحتنا الأولى والأخيرة، لاتفكر تأجل ولا حبة.

في البي دي بيكون عندكم مقابلة مع مريض في عيادات الجامعة، ساعة وحدة حسب ترتيب جدول البي دي، المفروض تقابلون مريض وتسولفون معاه وتعرضون المعلومات بعدين حق واجب البي دي. طبعًا كلنا ندري ان الموضوع يعتمد على الدكتور اللي بتكونون عنده، بس إن شاء الله يكون إنسان وتتعلمون منه.

بشكل عام يا اخوان، البلوك جدًا جدًا جدًا ممتع، غني بمعلومات كثيرة وجميلة، بتطلعون منه بفائدة عظيمة جدًا، لكن لاتستسهلونه، ولايغركم عدد المحاضرات اللي تحسونه مب واجد (لاتقول في ١.٢ درسنا أكثر، لأنك بتزعل على نفسك بعدين).

 

بلوك ٢.٤

 

تكملة للمعركة اللي بتخوضونها في ٢.٣، ٢.٤ بيكون خفيف وفيه أوف كل يوم خميس (طبعًا ذي بتشوفونها في الجدول بس مابتحسون فيها). هالبلوك بيكمل لكم مواضيع الباطنية بدايةً بتكملة الجهاز الهضمي (هالمرة السفلي)، أمراض الدم، الروماتزم والمفاصل، الأمراض واختلالات الجهاز المناعي، الأمراض المعدية (بكتيريا، فيروسات، الخ)، وينتهي بالجهاز التنفسي ومشاكله.

نبدأ هنا مع د. عبدالله بأمراض القولون ومشاكله (عصبي/عضوي)، بعدين مشاكل الإمساك والإسهال (مزمن/حاد) وبعدين تنتهون بالبواسير (المواضيع بسيطة وحلوة، حتى لو تكره الـGI). بعدها بنروح لأمراض الدم، إن شاء الله بيكون معاكم د. مرتضى السلمان (برضو أحسن شخص يعلمكم أمراض الدم)، بيعطيكم كامل الأمراض اللي بتصيب خلايا الدم الحمراء بالتحديد، أسبابها وأعراضها وشلون نعالج ونتحكم بكل مرض (هنا حاولوا بقد ماتقدرون تحضرون المحاضرة، لو ماقدرت، لاتفكر انك تسحب عالتسجيل). الأمراض بتشمل الأنيميا بكل أنواعها، منجلي، فولي، المناعية، الثلاسيميا، والغذائية. بعدها بننتقل للروماتزم وأمراضه وتشمل النقرص، الروماتزم حق المفاصل، والذئبة الحمراء.

بعدين يبقى لكم الأمراض المناعية وبتشمل نقص المناعة الوراثي والفيروسي، وشوية مشاكل ديرما (بالضبط نفس اللي خذتوه سنة أولى). بتاخذون بعدين الأمراض المعدية، وبتدخلون في جو ١.٢ من جديد، بتاخذون مثلًا الاسهال ومسبباته، الأمراض الفيروسية المنتشرة، وبتركزون بشكل كبير على فيروس نقص المناعة HIV. آخر شي بتروحون للجهاز التنفسي بدايًة بمرض السل (TB)، الربو، وبعض مشاكل الرئة اللي للأمانة ماعرفت أطلع لها ترجمة حلوة ومفهومة.

التوتر نفس الطريقة السابقة، وبيكون عندكم واجب بسيط..كيسين، تسوون عليهم برزنتيشن، وتحطونهم في سي دي وتعطونهم بعدين التوتر حقكم.

الأورالهنا بيكون بسيط حيل، بيكون عندكم عرضين تقدمونهم...واحد بيكون من الكيسات اللي درستوها في التوتر، والثاني من الواجب اللي عطوكم. الوقت هنا جدًا ضيق، ولكن الاوبجكتف لكل شخص بيكون جدًا بسيط. تقدمون العروض حقتكم وتروحون بيتكم.

 

نصائح عامة لسنة ثانية

 

-       السنة ذي حيل حيل جميلة وممتعة، ولكنها غنية بالمعلومات الكثيرة جدًا جدًا. استمتعوا فيها بس بدون ماتستسهلونها أو تهملون جزء منها لأنها مب صعبة. بمعنى، بتتطلب منكم بال طويل جدًا، لكن لنفسكم عليكم حق، لازم توازنون بين وناستكم ومذاكرتكم (الوناسة وتغيير الجو بأي هواية مو شي هامشي، ضروري).

-       لاتحاولون تقارنون أبدًا، أرجوكم، احنا أشخاص مختلفين جدًا مهما ظهر علينا التشابه، مختلفين بشخصياتنا وبظروفنا وباللي نعيشه في البيت وفي الطريق للدوام وفي الجامعة...كل شخص منا له كيفيته الخاصة، طوّر من نفسك بدون ماتقارن وتحس انك أسوأ من غيرك.

-       لاتخربط على نفسك وتقول توه بيسك مب مهم، الا مهم، لاتسوي روحك قوي حيل بالنسبة لذا الموضوع.

-       مافي مشكلة لو للحين ماحصلت طريقتك المناسبة للمذاكرة، لازلنا في البداية، اكتشف نفسك في هالناحية، صدقني بيكون شي رائع ونتائجه مذهلة لو عرفتها حتى لو كانت في آخر يوم في السنة. ممكن تجرب لك قروب مذاكرة مع كم شخص، الفائدة ممكن تكون عظيمة لك.

-       علاقاتك مع زملائك وزميلاتك هي أهم شي، لاتخترب بسبب سوء فهم أو تسرع في اتخاذ قرار معين، حافظ على هالعلاقات ولو بشكل سطحي لو اضطريت، لكن لاتهدمها بالكامل. مد يد العون لكل اللي تقدر عليه، تذكر ان "الله يسخر للطيبين أمثالهم".

-       بلوك ٢.١ بيكون بداية لكم في تخصص جديد كليًا. في كتاب مفيد ممكن تستخدمونه للنيوروأناتومي (Neuroanatomy made ridiculously simple: https://drive.google.com/file/d/1k2WdD1Sahkbl8m4GWUiZZZzNICP7xrKD/view?usp=sharing).الكتاب قصير وخفيف، سهل الفهم والمصطلحات، وفيه أسئلة في نهاية كل شابتر...موجود في جرير بثمانين أو تقدرون تحملونه. برضو، البلوك فيه معلومات كثيرة كثيرة، طالعوا فيديوهات لو يمديكم بقد ماتقدرون، لأن المحاضرات (خصوصًا النيورو أناتومي) ماتغطي الموضوع عدل وماتنشرح عدل.

-       بلوك ٢.٢ انتبه تسحب على كتاب السايكا، الكتاب سهل (رغم اني ماحبيت ترتيبه شخصيًا) لكنه جدًا مهم، في أسئلة في الكلوز تجي منه وماحد طق لك خبر، فالله يخليكم لاتسحبون عليه.

-       نصيحة النصايح انك تذاكر أول بأول (وبعنف) بدون أي ذرّة تأخير، في بلوك ٢.٣ بالتحديد، قلناها وبنقولها كل مرة.

-       نصيحة بلوك ٢.٤ انك تنجح فيه الله يعافيك، لاتأخر نفسك.

-       ركز على هدفك الأساسي، انت ليش موجود في الجامعة؟ ليش تبي تستلم شهادة طب؟ دائمًا ذكّر نفسك بالشي ذا عشان تصير مسنتر في طريقك للمكان اللي تبي توصل له وتبتعد أشد الابتعاد عن أي شي يشتتك.

-       لاتنسى توصي أهلك يدعون لك دائمًا، نحتاج دعواتهم في كل وقت وهم مصدر استمرارنا.

 

في النهاية

أتمنى انها تكون سنة جميلة جدًا لكم، والله حيل مايستاهل انها تمر ثقيلة عليكم بينما يمديكم تطلعون البقالة تشترون عصير وتستمتعون..شربوا عصير برتقال، لاتكثرون قهوة.

خلوها سنة للذكرى لكم، خلكم استثنائيين في عملكم ومثابرين على انكم ترفعون راس أهلكم وتجتهدون في شغلكم..وتذكروا ان رفعة اسم الكلية برفعتكم انتم، هالشي مب بسيط، لكنه مب مستحيل على أشخاص مثلنا.

 

أحب بعد أشكر اللي ساعدوني في كتابة التجربة

-       عبدالله الغانم

-       محمد الداود

-       علي الزيد

-       فاطِمة العسكر

-       حنان البنيان

وآخرين اعتذروا عن ذكر أسمائهم

 

 

أتمنى لكم دوام التوفيق والنجاح 🌹

عن الكـاتب :

A.bari

طالب طب في جامعة الملك فيصل (217).

  • المنطقة الشرقية
  • جامعة الملك فيصل
  • الطب والجراحة
  • الطب والجراحة


{{comment_msg}}

{{name_msg}}

{{submit_msg}}

تجارب ذات صلة
لمستقبل اعظم!
رسالة خريجة
"الإحباط المؤقت"
القبول في التخصص
المزيد من تجارب #تجربة_عامة
الجهات الأكثر تدريباً
أرامكو 1
شركة شرق 1
قدرات 1
بترو رابغ 1
لكل الجامعيين والمقبلين عليها: اسأل نفسك اولًا!! 1
تصنيفات التجارب