عرض الصورة بالكامل

السنة الأولى بكلية الطب - جامعة الملك فيصل

 

السلام عليكم ورحمة الله

في البداية، أعتذر على التأخير في تنزيل التجربة لظروف خارجة عن إرادتي.

وعشان مانطول في المقدمة نبدأ مباشرة في الشغل... أوعدكم السنة ذي رهيبة حيل.

 

بدايةً، تقسيم التجربة بيكون على عدة أقسام: -

·      بداية الدراسة، شنو أنظمة الكلية؟

·      شنو المواد اللي بندرسها؟ (بشكل عام)

·      ابي أعرف تفاصيل أكثر عن البلوكات والمواد، شسالفتهم؟

·      طيب شرايك بسنة أولى بشكل عام، شوضعها؟

 

 

فلنبدأ...

 

بداية الدراسة، شنو أنظمة الكلية؟

بسم الله الرحمن الرحيم...في نقاط بسيطة توضح لكم بشكل بسيط نظام الكلية والدراسة فيها: -

 

-       نظام الكلية يتعامل بالأرباع، مثل التحضيرية يعني. عندكم أربع بلوكات في السنة، ومادتين سنويتين (PD و Progress Test).

 

-       كل بلوك عليه ست ساعات في المعدل، درجاته تتوزع كالتالي (الميد والفاينل، الاختبارات العملية، الأسايمنتات للابات، التوتر سشن).

 

-       كل بلوك يكون فيه مواد أساسية مثل (الهستولوجي، الأناتومي، الفسيولوجي، الباثولوجي، الفارما)، ومرات يكون البلوك في مواد متخصصة مثل (المايكرو، الأميون، السايكولوجي).

 

-       البي دي بيكون عليها خمس ساعات في المعدل، ويمنع الغياب فيها أبدًا أو بتضطر تعيدها وتتأخر سنة كاملة.

 

-       البروقرس عليه ثلاث ساعات في المعدل، وفي سنة أولى شرط تجيب pass في اختبارين، أو good في الاختبار الرابع (بنتكلم عنه بالتفصيل تحت).

 

-       الدوامات على نوعين...إما أن تكون المحاضرات في الصباح، واللابات والسشنات بعد الظهر (هذا نظام البلوك الأول والثاني)، أو تكون اللابات والسشنات في الصباح والمحاضرات بعد الظهر (هذا نظام البلوكين الثالث والرابع).

 

-       بيكون عندكم محاضرة اسمها (Patient Lecture) يجيبون فيها مريض يعطيكم قصته، وتسألونه عن حالته وتاريخه المرضي، وتعرضون الحالة في التوتر سشن (Patient Report).

 

-       درجات التوتر سشن موزعة على (تقييم البرزنتيشن، تقييم البيشنت ريبورت، تقييم الأداء "Dynamics" مرتين في البلوك). بيكون في تقييم (Professional Behavior) يضاف لملف مادة لبي دي.

 

-       بداية السنة بتشترون مانوال خاص بمادة البي دي. وقبل كل بلوك بتشترون مانوال خاص فيه، بيكون موجود فيه (الثيمات، الكيسات للتوتر سشن)، ومانوال ثاني للمعمل فيه الأسايمنتات والتعليمات.

 

-       الثيمات هي عبارة عن أهداف التعلم (Learning Objectives) اللي المفروض تكون فاهمها بنهاية هالبلوك.

 

-       معدل التحضيرية بيتصفر، بتبدأ رحلة جديدة ومعدل جديد.

 

عشان مانكثر كلام في الأنظمة، خل ننتقل للمواد وبتكون فيها المعلومات مرتبة والمصطلحات مفهومة أكثر.

 

شنو المواد اللي بندرسها؟

 

·      البلوك الأول: البلوك يركز في البداية على مرض السرطان في أنحاء مختلفة من الجسم، ويعطي شرح لبعض المواضيع اللي ماخذتوها في التحضيري مثل نسيج العظام وتشريح الثدي والقولون. بالإضافة، بيكون في إعادة لبعض المواضيع مثل الجنتكس. اللابات في هالبلوك غالبها هستولوجي، وشوي بايوكمستري وجنتكس، وعليهم اختبار عملي نهاية البلوك. السشنات فيها بتكون بسيطة ومشابهة بشكل كبير للتحضيري عدا أنكم بتشتغلون على أمراض حقيقية.

 

·      البلوك الثاني: البلوك ذا بيركز بشكل كبير على الجهاز المناعي والمايكرو، وشوي يجيب لكم في الجهاز الهضمي والجلدية. طبعًا ضروري في البداية تشيلون من راسكم كلام الطلاب أن البلوك ذا يخوف والرسوب فيه كثير وصعب ومادري شلون. البلوك جميل، وبتطلعون منه بحصيلة علمية قوية لو اشتغلتوا عليه صح. مابنسوي نفسنا مثاليين ونقول انه سهل، صحيح مضغوط أكثر من البلوك الأول، ولكنه جميل جدًا وبتستفيدون منه بشكل مب طبيعي لو اشتغلتوا عليه عدل. اللابات في هالبلوك بتكون عن المايكرو (البكتيريا بالتحديد)، واللابات فيه رهيبة حيل، بتشوفون شغلكم قدام عيونكم وبيكون فعلًا لاب حقيقي، وبيكون عليه اختبار عملي نهاية البلوك. برضو بيكون في لابات للأناتومي، وعليها اختبار عملي نهاية البلوك. السشنات مثل البلوك الأول نظامها، حالة تتناقشونها وتعطون بعدها برزنتيشن عن المرض.

 

·      البلوك الثالث: هالبلوك بيكون نقلة نوعية لكم بشكل أكبر، تركيزه الكامل على الجهاز التنفسي، والدوري الدموي، والكلوي. بيكون كل شغلكم تقريبًا على كتاب قايتون (فسيولوجي). البلوك مب خفيف، لكنه جميل جدًا لأن بتدخلون معاه في حالات من حياتكم العامة وتشوفونها قريب منكم. اللابات هنا بتكون مركزة عالفسيولوجي، والأناتومي بيكون في البداية، وثنينهم بيكون عليهم اختبار عملي نهاية البلوك. السشنات مشابهة للبلوكات الماضية من ناحية الترتيب، لكنها مختلفة من ناحية الحالات اللي بتاخذونها، بتجيكم حالة حقيقية والتوتر بيساعدكم في إيجاد التشخيص المناسب. العرض مايكون في نفس الأسبوع، يكون متقدم أكثر فيكون عندكم مجال أكبر. بيكون في هالبلوك إضافة اسمها التوتوريال، تكون تطبيق على اللي درستوه ويكون معاكم الدكتور يأخذ ويعطي وتنتاقشون عن بعض الحالات والأمراض، حسب توزيع قروبكم (A أو B). برضو بيعطونكم أساسيات الـBLS.

 

·      البلوك الرابع: البلوك ذا بيكون تركيزه على علم النفس، نشأته وتاريخه وشلون نتعامل مع المريض، وتطبيقات للعلم. البلوك ذا خفيف حيل بالنسبة لعدد المحاضرات وحتى الدوام. اللابات فيه بتكون بس أناتومي، وبيكون عليها اختبار عملي نهاية البلوك. السشنات بتكون مختلفة، مافي برزنتيشن ولاشي، بس نقاشات عن اللي تعلمتوه وبعض الأسايمنتات. شي إضافي بيكون موجود هالبلوك وهو مهارات التواصل (Communication Skills)، بتتعلمون فيها طريقة التواصل مع المريض بشكل فعال وشلون تاخذون الهستوري منه.

 

·      البي دي: المادة ذي لها سشناتها الخاصة (Coach Group)، تكون محددة من بداية السنة. تتناقشون فيها وتسولفون عن المجتمع الطبي وكم شغلة خارجية. بيكون فيها كم شي إضافي هالمادة، مثل لابات الإحصاء، والمنتور اللي يركز عالأبحاث، وبيكون من ضمنها زيارة مجمع العيادات الخاص بالكلية، وبرضو رفلكشنات وواجبات. كل فترة يكون في مقابلة تقييم لأدائكم، والواجبات اللي سويتوها للمادة ذي. ممنوع منعًا باتًّا أنك تغيب عن أي اجتماع للمادة ذي أو بتضطر تعيد المادة.

 

·      اختبار البروقرس: الاختبار يقام أربع مرات في السنة، والنجاح في كل اختبار يعتمد على متوسط درجات الدفعة. بمعنى، لو درجتك أقل من المتوسط، بيعتبرونك متعثرFail ، لو أعلى من المتوسط، بتكون ناجح Pass ، لو أعلى من المتوسط بدرجات كثيرة (أكثر من خمس ست درجات)، بيعطونك درجة اسمها Good. النجاح في هالمادة يعتمد على أنك تجيب عالأقل good في الاختبار الرابع، أو pass في اختبارين عشان تعتبر أنك نجحت في هالمادة، لكن حاول تخلي تركيزك أنك تجيب أعلى درجة ممكنة في هالاختبار واعرف له صح لأن طريقته أنك لو جاوبت صح بيعطونك درجة، بس لو جاوبت غلط بينقصونك.

 

 

ابي أعرف تفاصيل أكثر عن البلوكات والمواد، شسالفتهم؟

 

بنبدأ ندخل في تفاصيل أكثر بالنسبة لهذي السنة وشلون بيكون الشغل فيها...

لو ماودك تدخل في التفصيل حيل، يمديك تعدي هالفقرة مب مشكلة.

 

Block 1.1

 

البلوك ذا منظم بشكل مب طبيعي، الدوام فيه مريح والمواضيع حلوة وبسيطة وتعتبر بداية جميلة للكلية. الكوردنيتر بيكون د. محمد بهجت (حفظه الله). بيبدأ معاكم البلوك بتعريفات ومقدمة لمادة علم الأمراض (Pathology). بيعطيكم المحاضرات د. كرشنا، أنصحكم تشوفون المحاضرة عالسريع قبل ماتحضرون، وتركزون مع الدكتور لأن أغلب أسئلته بتكون من الكلام اللي يقوله في الشرح. بالإضافة للباثو، بيكون عندكم شوية أناتومي لبعض المواضيع مثل الصدر والقولون ومفصل القدم (Ankle joint)، والهستولوجي بيكون عندكم شغل كثير فيه ولابات مب شوي بالنسبة لنسيج العظام والدم وبعض المواضيع اللي بترجعون لها من جديد، وبيكون اللاب عبارة عن رسومات للخلايا والأنسجة وبيبدأ استخدامكم للمجهر لأول مرة. بعد الميد بيبدأ شغلكم بشكل كبير على السرطان وشلون يتكون وليش وشسالفته وشنو مسبباته، هنا يفضل انك تبدأ قراءة كتاب الباثولوجي بالنسبة لشابتر السرطان. بتاخذون بعد محاضرات جنتكس، والبايوكمستري شوي، وبيكون عليهم تقريبًا أربع لابات أو ثلاثة. نهاية البلوك بيكون عندكم اختبارين عمليين، واحد للهستولوجي والثاني للجنتكس والبايوكمستري. طبعًا قبل كل لاب بيكون عندكم مراجعة مع الدكتور نفسه لكل اللي خذتوه، لاتضيعونها وحاولوا تستفيدون منها. التوتر سشن بتكون بداية الأسبوع وبيكون البرزنتيشن نهاية الأسبوع. على سنتنا كان كل اثنين يقدمون موضوع واحد، وكل سشن ناخذ موضوعين. المواضيع كانت عن سرطان الثدي، سرطان القولون، سرطان الجلد، وبعض الأمراض الوراثية والجينية.

 

Block 1.2 

 

البلوك ذا مختلف عن الأول، مب صعب، مختلف. بيبدأ معاكم البلوك بالمايكرو؛ البكتيريا، تالي الفيروسات، تالي الفطريات والطفيليات بشكل بسيط. وبعد الميد بيكون في شوية محاضرات عن الجهاز الهضمي في الأناتومي والفسيولوجي، وشوية محاضرات في الجلدية (Dermatology). على طول البلوك، بتدرسون كتاب عباس لجهاز المناعة (Immunology)، كتاب رهيب، بتستغرقون في قراءته كأنه قصة، ورجاءً، فعلًا لاتفوتون قراءته لأنه بيكون تقريبًا بدايتكم الحقيقية في قراءة الكتب الطبية وبيخليكم تتعودون وتلتزمون على الكتب. بيكون في عندكم مقدمة في بعض مواضيع الفارما، حليوة حيل حاولوا تستفيدون منها. على كل حال، الدوام بيكون ثقيل نوعًا ما بسبب ضغط المحاضرات خصوصًا بداية ونهاية البلوك، حاولوا تضبطون وضعكم وماتتأخرون في المذاكرة والتسويف، ولاتظلمون نفسكم من ناحية الراحة الجسدية. اللابات هنا بتكون مركزة بشكل كبير على البكتيريا، شلون تصنيفها وشلون تتكون وشلون تسوون عليها الاختبارات في المعمل وطريقة المضادات الحيوية وشغلها، اللابات شي رهيب لأن بيكون فيها شغل مب شوي وبتشوفون نتيجة شغلكم مع كل لاب. بيكون في اختبار عملي كتابي نهاية البلوك على لابات المايكرو وعليه مب شوي من درجات البلوك، فحاولوا تركزون على محاضرات اللابات والمانوال. لاب الأناتومي بيكون عن الـGIT، وبيكون عليه أوسبي نهاية البلوك، سهل وبسيط. التوتر سشن مثل البلوك الأول، تاخذون الحالة بداية الأسبوع وتشرحونها نهاية الأسبوع. بتكون عن الالتهاب البكتيري، الفيروسي، بعض حالات الإصابة بالفطريات والطفيليات، قرحة المعدة، وبعض أمراض الجهاز المناعي والجلدية.

 

Block 1.3

 

البلوك ذا نقدر نقول هو دخولكم الأول للعالم الطبي ونظامه. بيركز هالبلوك على الجهاز التنفسي وطريقة عمله، الجهاز الدوري الدموي والقلب وأموره، وأخيرًا يكون تركيزه على الكلى ونظامها. البلوك بطل، الشغل كله تقريبًا عالفسيولوجي في كتاب قايتون، وشوي في الأناتومي للأجهزة المذكورة. البلوك رهيب بمعنى الكلمة، بيصير تاخذون فيه مواضيع كثيرة منتشرة في حياتنا مثل الربو، والضغط، وأمراض الكلى والفشل الكلوي، والجلطات. بتتغير عندكم مفاهيم كثيرة وبتتعلمون أشياء طبية كثيرة في هالبلوك وبيطلع منه الواحد وهو يقول "خلاص أنا دكتور". اللابات في هالبلوك بتكون للفسيولوجي، بتركز على كل جهاز، بتكون البداية مع الجهاز التنفسي وبتستخدمون السبايرومتر وتحسبون سعة رئاتكم، بعدها بتاخذون الـECG ، وبعدين شلون تحسبون الضغط للمرضى. بيكون عليه اختبار عملي خفيف لطيف نهاية البلوك. لابات الأناتومي بيكون عليها أوسبي نهاية البلوك بخصوص الأجهزة الثلاثة اللي ذكرناها، بسيط كالعادة. في شي إضافي بيكون في هالبلوك وهو التوتوريال سشن؛ السشن ذي تكون مع قروبكم كامل (٤٥-٦٠ طالب) ويكون فيها تطبيق عملي للي خذتوه خلال الأسبوع. مثلًا هالأسبوع درستوا عن الربو وبعض أمراض الجهاز التنفسي، يكون التوتوريال مركز على هالأمراض ويجيب لكم الدكتور حالات وأسئلة وتشاركون كل واحد بالمعلومة اللي عنده ويكون في نقاش على هالموضوع. برضو بيكون عندكم كم ساعة تاخذون فيها Basic Life Support (BLS)، وتختبرون فيهم، لكن مايعطونكم شهادة يعني، تعليم لفايدتكم بس وعليها درجات. التوتر سشن شوي مختلفة هالمرة، بيكون عندكم تقريبًا ست سشنات تناقشون فيها الحالات، وثلاث سشنات تشرحون فيها البرزنتيشنات؛ يعني مب مثل البلوكات الماضية كل أسبوع سشن وبرزنتيشن. بتجيكم حالات عن الاسترواح الصدري، التسمم الكحولي، اضطرابات الحمضية والقاعدية في الدم، الأصوات الغير طبيعية من القلب، واضطرابات السوائل والأملاح في الدم.

 

Block 1.4

 

البلوك ذا بسيط والدوام فيه خفيف لأقصى درجة؛ يعني المحاضرات ممكن تكون بمعدل ٥ في كل أسبوع. البلوك ذا بتكون بدايته في فلسفة علم النفس ونشأته وشلون تطور وصار لنا العلم الحالي. برضو بيكون فيه الصحة النفسية، شلون تقدر تزيد من جودة حياة الناس، وشلون تتواصل معاهم. تقدر تعتبره في البداية ثقافة عامة عن الصحة النفسية وصحة الإنسان. بعدين بتدخلون شوي في طرق العلاجات النفسية والبشر وشخصياتهم وشالمؤثرات على حياتهم. بيكون عندكم في هالبلوك سشنات للتواصل (Communication skills)، يصير تتعلمون فيها شلون طريقة التواصل المناسبة مع المريض وشلون تاخذون منه الهستوري بطريقة ممتازة، وبيكون في تطبيق في كل سشن. طبعًا بيكون في بعض المواضيع عن الأخلاقيات الطبية (Ethics)، يعني أضعف الإيمان حاولوا تاخذون عنها فكرة عامة. السشنات في هالبلوك مختلفة عن البلوكات السابقة، مابيكون في برزنتيشن وأمراض وحالات، بتكون بس نقاش عن موضوع من اللي خذتوهم ويكون عليه أسايمنت تسلمونه للتوتر. يعني مثلًا بتكون نقاشاتكم عن بعض العادات السيئة على الإنسان مثل الخمول، والنوم السيء، والأكل الغير صحي، وتشتغلون على تحسينها وتحويل هالعادات إلى عادات حسنة.

 

PD Line

 

المادة ذي سنوية، مب أرباع، وتنقسم لعدة أقسام، بنتكلم عنهم حبة حبة: -

 

-       الكوتش قروب (Coach Group): تكون تقريبًا ١٣ اجتماع في السنة كاملة. كل اجتماع تجلسون وتنتاقشون عن موضوع أخلاقيات طبية أو تجارب لكم أو لأقاربكم وتسولفون مع الكوتش والزملاء عن هالموضوع. بيكون في واجبات وتسليمها للكوتش حقكم. كل الواجبات تجمعونها في ملف (Portfolio)، ويشيكون عليه مرتين في السنة وعليه غالب درجات البي دي.

 

-       الإحصاء: ذي المادة بتكون مفيدة لكم عشان الأبحاث، بيكون معاكم د. سيد يعطيكم محاضرتين بعدها لاب. اللاب تراجعون فيه المحاضرتين، وتتعلمون تطبيقهم على الكمبيوتر في الـSPSS، بعدها يكون كويز بسيط ويخلص اللاب. المادة بسيطة وخفيفة، لكن لاتهملونها لأنها بتكون مفيدة بعدين إذا بدأتوا في البحث.

 

-       المنتور: ذي نفس نظام الكوتش، يكون توزيعهم تقريبًا في البلوك الثاني. الفرق هنا أنها تركز على البحث العلمي، شلون طريقته وشلون تسوون البحث وشلون تنتقدونه. بتكون مفيدة لو الدكتور حاول يفيدكم واشتغل معاكم عليها، وانتو بعد حاولوا تستفيدون منها بقد ماتقدرون لأنها تعتبر تهيئة لو بتسوون بحث بعدين. على سنتنا كان في واجب ننتقد فيه بحثين ونسلمه للمسؤول عنا.

 

-       الانترنشب: بتكون زيارة لمدة نص يوم لمجمع العيادات في الجامعة، بيوزعونكم عالعيادات (طب عام، الطوارئ، العيون، الأطفال، المختبرات...إلخ) وتروحون تشوفون الدكتور شلون يتعامل مع المرضى ويتفاهم معاهم وبعدها يكون عليكم أسايمنت تعطونه الكوتش. التجربة جميلة حيل بحكم أنك أول مرة تدخل العيادة ويكون في مرضى.

 

-       القلوبال هلث + الاثكس: بتكون محاضرات بسيطة ومناقشات موزعة على مدار السنة، وتتوزعون على قروبات وترتبون برزنتيشن تعرضون فيه الموضوع، ومرات يكون بس نقاش، ويمكن تمثيلية بسيطة.

 

Progress Test

 

الاختبار يقام أربع مرات في السنة، مكون من ٢٠٠ سؤال تقريبًا، يقيس من خلالها تقدم مستواكم بين كل اختبار واختبار. النجاح قلنا من متوسط درجات الدفعة، يعني لو جبت فوق المعدل بتاخذ Pass، ولو جبت تحته بتاخذ Fail، ولو فوق المتوسط بكثير (خمس أو ست درجات تقريبًا) بتطلع لك Good. سنة أولى بيكون أول اختبار مب محسوب معاكم، يعني كأنه تجريبي؛ لكن مايعني أنكم تهملونه، بالعكس اختبروه بشكل حقيقي لأن لولا سمح الله مامشيتوا في باقي الاختبارات بيكون لكم هالاختبار سند. الاختبار طريقته مختلفة، لو جاوبت الاختبار صح، بتنحسب لك درجة كاملة، لكن لو جاوبته غلط بتنخصم عليك الدرجة، على حسب عدد الخيارات. بمعنى، لو السؤال بخيارين، بيكون (+1) للخيار الصح، و(-1/1 = -1) للخيار الخاطئ. لو السؤال بثلاث خيارات بيكون (+1) للخيار الصح، و(-1/2 = -0.5) للخيار الخاطئ. لو السؤال بأربع خيارات بيكون (+1) للخيار الصح، و(-1/3 = -0.33) للخيار الخاطئ. يعني كل مازاد عدد الخيارات قلّت نسبة النقص. تحتاج في هالاختبار تعرف نفسك وتوزن خياراتك صح، يعني لاتتردد حيل وتحل أسئلة قليل وتالي تجيب درجة ناقصة، ولاتتهور حيل وتحل الاختبار كامل وتجيب درجة ناقصة؛ تعلم شلون توازن بين الأسئلة اللي متأكد منها والأسئلة اللي يستاهل تخاطر فيها. يعني ماينفع تخاطر بسؤال فيه خيارين أنت مب متأكد منه لأن النقص فيه كثير، لكن ممكن تخاطر بسؤال فيه خمس خيارات لأن النقص فيه قليل ومب يكون تأثيره كبير. درجتك في المادة بشكل عام تعتمد على الاختبارات الأربعة، والاختبار الرابع يكون له وزن أكبر. لولا سمح الله حملت المادة بيكون لك ريست في الصيف.

 

طيب شرايك بسنة أولى بشكل عام، شوضعها؟

 

السنة الأولى في الكلية جميلة جدًا، بيكون فيها نقلة نوعية غير التحضيري في تنظيمكم لوقتكم ولأولوياتكم وباقي أمور حياتكم. جميلة أنها بتدخلك في جو الكلية وجو الطب كامل، حلوة أنها بتدمجك مع الكلية أكثر، ومع زملاء الدفعة أكثر. استفد من هالسنة قد ماتقدر، اطلع منها بأقصى قدر من العلم تقدر عليه واتعب على نفسك فيها. ماعليك من اللي يقول لك ركز عالمعدل بس، أو ركز عالمحاضرات بس، ركز على أنك تتعلم هذا أهم شي. كل ماتعلمت أكثر كل ماتحسنت أكثر وضمان يكون المعدل لعبتك ومابتشيل همه لو ركزت ومشيت صوب هدفك، وهو الاستفادة والتعلم فقط. انغمس في النشاطات الخاصة بنادي الكلية، إن وُجدت، وشارك بآرائك وخل لك دور بارز أنك ترفع اسم الكلية بالعلم وبرفعة نفسك، لاتنسى أنك جزء من الكيان وعليك حق أنك تجتهد وتعمل بأقصى طاقتك.

 

بتمر عليك لحظات كئيبة ولحظات سعيدة، تفاعل مع أصدقائك وعبر لهم عن مشاعر الحب ومشاعر الحزن اللي تعيشها، لاتكبت شيء بداخلك ولو كان بسيط، فضفض وتكلم وقل، ولكن ركز في النهاية على هدفك وهو التعلم. مب كل الأوقات بتكون سعيدة في الكلية، لاتجهد نفسك لحد الموت، ولكن لاتتساهل معها لحد التراخي (لا إفراط ولاتفريط).

 

بيكون عندك مجال تتعلم الكثير والكثير، لاتحصر تعلمك بالطب فقط. اقرأ، مارس الرياضة، اطلع مع أصحابك، رح تمشى في الحديقة، اجلس مع أهلك وزر أقاربك، الكلية مب كهف عشان تكبت نفسك فيها وفي المذاكرة...في الأخير أنت إنسان ولنفسك عليك حق أنك تمتعها وتعطيها وقت خاص.

 

بتتعلم في أول سنة أن أصدقائك مب طول الوقت معاك، والكل عنده أشغاله الخاصة، ومع ضغط الجدول بيكون مب سهل أن أوقات فراغكم تتوافق مع بعض. بتقضي وقت مب قليل مع نفسك، ركز أنك تستفيد من هالوقت في إمتاع نفسك وإفادتها. جرب طرق كثيرة للمذاكرة ولكن لاتضيع نفسك وحدد طريقة مذاكرة واحدة من أول أسبوع في بداية البلوك عشان لاتتشتت. جرب أماكن كثيرة للمذاكرة، مقاهي، مكتبات الجامعة، شؤون الطلاب، الكافتيريا، نوّع في كل مرة. ولاتنسى تراجع للاختبار، وتذكر أن المذاكرة اللي بدون مراجعة مب مذاكرة.

 

في الأخير...السنة الأولى سنة جميلة جدًا، مليئة بالأحداث والمواقف الجيدة والسيئة، وكلها تعطي لهذي السنة طعمها. كن دائمًا بقرب أصدقائك وتحسس حاجتهم وبادر بمساعدتهم، وبالمثل لو احتجت المساعدة بادر بطلبها من صديقك، لاتستحي من إبداء مشاعرك له، ولاتكتم شيء في داخلك. احرص أيضًا أن تمارس هواياتك ولاتقطعها، قننها بس، لكن لاتقطعها. ركز على هدفك الأساسي وهو التعلم فقط، واستفد من النشاطات والدورات الخارجية لو حصلت لك، وشارك هالفائدة مع زملائك.

 

أخيرًا...كلنا في دفعة ٢١٧، وإخواننا اللي أكبر منا، نسعد بكم زملاء وإخوان معنا في الكلية، فخورين بوصولكم لهذي المرحلة، وواثقين بكم وبقدرتكم على النجاح في هذي السنوات الجميلة.

تذكروا دائمًا أن احنا بجانبكم، ويدنا على يدكم...في خدمتكم طوال الوقت.

 

 

مع كامل الحب والتقدير، وتمنياتنا لكم بالتوفيق والنجاح إن شاء الله 🌹.

أخوكم/ عبدالبارئ علي الحليمي.

 

 

 

 

 

 

 

عن الكـاتب :

A.bari

طالب طب في جامعة الملك فيصل (217).

  • المنطقة الشرقية
  • جامعة الملك فيصل
  • الطب والجراحة
  • الطب والجراحة


{{comment_msg}}

{{name_msg}}

{{submit_msg}}

تجارب ذات صلة
لمستقبل اعظم!
رسالة خريجة
"الإحباط المؤقت"
القبول في التخصص
المزيد من تجارب #تجربة_عامة
الجهات الأكثر تدريباً
أرامكو 1
شركة شرق 1
بترو رابغ 1
لكل الجامعيين والمقبلين عليها: اسأل نفسك اولًا!! 1
مستشفى النور التخصصي 1
تصنيفات التجارب